वास्तविकता

बेँसीबाट लामो उकालो हिँडेर
अन्नको भारी दलिनमा राखेको मात्र छु
घरभित्र गाग्रीहरू खाली छन्
पँधेरो तल खोल्सामा छ
गाग्री बोकेर नहिँडी धर छैन

देख्‍नासाथ गाई बाख्रा कराउन थालेका छन्,
पँधेरोबाट फर्केपछि
हँसिया बोकेर कान्लातिर नदौडी धर छैन



अन्न र पानीले मात्र के हुन्छ र
आगो बाल्ने सिन्कोसम्म छैन भित्र
अँध्यारो हुनुभन्दा अघि नै
बन्चरो बोकेर जंगलतिर नगई धर छैन

धपेडीविना नचल्ने रै'छ साथी
पसिना नबग्‍ने शरीरको भर छैन