Facebook Fragments XIX

लेखाजोखा छैन तिमीलाई

आफ्नै जीवनका ठेसहरूको,

भरसक कोशिश नगरे राम्रो

मेरा शब्दहरूसँग ठोक्किन

---

आफूलेमात्र ताप्‍न फुकेको आगो होला

दाउरा पनि सुकेकै हाल है महोदय,

पोचिएको चिसो पर्‍यो भने

सास्ती हुन्छ छिमेकीलाई !

---

समय बलवान होस् नहोस्

मैले छोडेको साँढेले कुनै दिन

मलाई नै हान्दैन भन्ने छैन,

मैले ल्याएको परिवर्तनमा

बहिस्कृत मै हुनसक्छु !

---

यो मुलुकमा अब

अपजश लिन नचाहनेहरूबीच

सघन प्रतिस्पर्धा गराई

विजेतालाई पुरस्कृत गर्ने

विशेष व्यवस्था हुनुपर्छ

---

म Fiction मान्दिनँ

Fact पनि मान्दिनँ

अरू केही बाँकी भए

बेलैमा भनिदिनु होला

---

नगरे कै राम्रो

मान्छेको देवत्वकरण,

ग्यारेन्टी नै हुँदैन

कुन बेला बनिदिने हो

छेपारो, बिरालो वा गोही,

वेकारको टेन्सन !

---

भाँचिएको मन

बढी खतरनाक हुन्छ

भाँडिएको मनभन्दा

--

मान्छे न हो महोदय ऊ पनि

आफ्नो हिसाबको कद खोज्छ

बढ्ने सम्भावनाको हेक्का हुँदा

चेपिएर रहनुको हद खोज्छ

---

सिँचाइको बारेमा

भाषण त ठोक्नु भएछ

तर अन्तर नै खुलेन रे

फोका र मूल बीचको