चोइटाहरू -- ५

गाउँलाई चिन्छु भन्नेहरू
गाउँतिर जानै छोडेछन्,
देशलाई बुझ्छु भन्नेहरू
देशमै बस्न छोडेछन्
त्यसैले होला हिजोआज
गाउँलाई देशले चिन्न छोडेछ
गाउँले देशलाई बुझ्न छोडेछ!

---

हे देशलाई 'माया गर्छु' भन्नेहरू

साँचो माया पनि 'देखाउने' गर

तिम्रो 'टाढाको म्वाइँ' पुगेन कतै

बरू आई हाम्लाई सघाउने गर

---

हिजोआज सहर पस्दा लाग्छ

कसै कसैले आफ्नो भविष्य

फेरि पनि कि खण्डहरमा

कि मरूभूमिमा

खोज्नु पर्ने

हो कि?

---

एउटा यस्तो क्षण आउँछ

त्यससँगै यस्तो चेतना आउँछ:

सकेजति 'राम राम' भन

सकी नसकी काँध नथाप

---

आफू सुध्रेर

अरूलाई गाली गर्न

न सिकियो

न सिकाउन सकियो