महान बन्न खोज्दैछु

म छोड्दैछु
छोड्न चाहन्छु
बोल्न
काँडाहरूको बारेमा
चोकेहरूको बारेमा
छिर्केहरूको बारेमा ।

कथा तिमीले सुन्यौ
अरूले पनि सुने
पिडाको बोझ घट्दैछ
घट्नेछ
र पूरै हट्नेछ ।


यत्ति हो 
जबसम्म
टट्टाइरहन्छ खत
मन खुल्दिन्छ
आँखा खुल्दिन्छ
अनि
मुख खुल्न खोज्छ !

जब
तिमी नजिक हुँदैनौ
सुन्नलाई,
मात्र हुन्छन्
खुलेको मन
खुलेका आँखा,
शब्दै-शब्द
कथै-कथा
उकुसमुकुस !

तर
त्यो उकुसमुकुसलाई थिचेर
म आफूलाई
फेरि एकपटक
महान बनाउन खोज्दैछु ।

त्यसैले
मलाई बिर्सिन देऊ
हिजो, अस्ति
दुखेको अतीत, सबै,
हराउन देऊ खतहरू !