चोइटाहरू -- १७

देख्नुभयो होला रामराज्य,
अनि सुन्नुभयो होला कथा,
बाँदरले सेतु बनाएको,
पुच्छरले लङ्का डढाएको
तर, बडिबा
त्यो‌ त त्रेतायुग थियो

---

हैट्
देशलाई
भतिजा होइन
नतिजा चाहिएको हो !
---
उचालिएको मन
पछारिएको तन,
छट्पटिको मात्रा
शायद बराबर हुन्छ!
---
न पोका दिएर माग्न जानियो
न धोका दिएर भाग्न जानियो
लत बस्यो बालुवामा खुसी रोप्ने
जे फल्यो त्यही सर्वस्व ठानियो
---
गृहस्थबाट वाक्कदिक्क होइन म
वानप्रस्थ उन्मुख पनि छैन म
तर मोह बाँकी छ स्वतन्त्रताको
कारावासको‌ आवेदन दिन गइनँ म