चोइटाहरू -- १३

काम गर्ने मान्छे बेलाबेला सन्किन्छ
नतिजा दिने मान्छे घरीघरी रन्किन्छ
कामचोर पो त अर्घेलो हुन्छ सधैंको
ऊ भने एकदिन कुनामा थन्किन्छ

---

झिंगा धपाई विद्यावारिधि,

गोता नखाई प्राध्यापन,

कसैलाई मिलेको छ?

लौ न जानकारी पाऊँ !

---

कचौरामा पानी जगेडा राखी

बारीमा अगुल्टो फालौंला

आधा पाखो जलोस् कान्छी

त्यसपछि निभाउन थालौंला

दुईदिने जिन्दकी लानु के छ र

धुनी त बाल्नै पर्छ है

न तिम्रो जान्छ न मेरो कान्छी

पतिंगर फाल्नै पर्छ है!

---

लौ न प्रभू मलाई साह्रै औडाहा भो

कस्तो खाइ न पाइको दौडाहा भो

यो दुनियाँसंग नै भरम् भो

देखाउनै नमिल्ने शरम् भो

कि दंग्याउनुको हद तोकि देऊ

हद नभए पनि कद तोकि देऊ !

---

सामुहिक सफलतामा मात नलागोस्

विफलतामा व्यक्तिगत बात नलागोस्,

यस्तो होस् सहयात्रा साथीभाइको

आँशु बगोस् अफशोस हात नलागोस् !