चोइटाहरू -- २

कसैको मनमा बस्तो छु

कसैको नजरबाट खस्तो छु

खोइ म कस्तो छु कस्तो छु

महंगो छु कि सस्तो छु!

---

सन्ठीको भर्‍याङ्

प्लास्टिकको भड्डु

र शत्रुको दौरा हेरेर बनाएको रणनीति

उस्तै उस्तै लाग्छन् मलाई !

----

विनिर्माण गरेर हेर

देश बनाउने सपनाहरूको,

सायद देखा पर्नेछन्

तिम्रा सबै नायक

र मेरा खलनायकहरू

---

मैले पौडी सिकेको छैन

गोताखोरी सिकेको छैन

केवल आँकलन गर्न सक्छु

भेलको ढंग हेरेर बहावको

दहको रङ्ग हेरेर गहिराइको

राहतको कुरासम्म त ठिकै छ

तर वेकार हुनेछ अपेक्षा

म जस्तोबाट उद्धारको

.....

गति बिग्रेको थाहा हुने,

मति बिग्रेको नहुने

यो साला उमेर!